خواطر: رحلة عمل الى بغداد
؟! مع الأسف ؟!
تصل مطار بغداد
الدولي الله يساعدك اذا اضطريت ان تدخل الحمام مكرم السامع ؟! لا عينك شافت ؟! عقد
التنظيف بمبلغ 1,200,000مليون و مئتين الف دولار مفرهدين المبلغ وجايبين عجوزة
عراقية (أم شاكر) تنظف ؟! اذا ينطوها 3 اوراق بالشهر هاي 3600 دولار بالسنة ؟!
خطية المسكينة (أم شاكر) يمكن ما تقدر تكوم على حيلها ؟! واحنا المسلمين عدنا
مشكلة بالنجاسات والطهارات واكيد المسكينة (أم شاكر) تصلي بس غير من الفقر والعوز
؟! واكيد مسوية واسطة حتى تتعين ودافعه كم ورقة (100 دولار) ؟! مطار اربيل نفس
العقد جايبيين فلبيني لحمام الرجال وفلبينية لحمام النساء اول ما تدخل الحمام
وتطلع مكرم السامع يركض الفلبيني وراك وينظف ؟! ويريدون مطار اربيل يوگع بيدهم حتى
يصير نفس الطاسة ونفس الحمام لمطار بغداد الوسخ القذر ؟!
تطلع من مطار بغداد يتلاگفوك
اهل السيارات ب 5 , 10 , 20 الف دينار ثمن النقل الى ساحة عباس بن فرناس تعتمد على
الموسم , واذا اكو باصات حكومية فلازم تدفع رشوة (بالعراقي خاوه بالعربي بخشيش
الزامي) ؟! وصلت الى ساحة عباس بن فرناس واتفقت مع ابو التاكسي ليأخذك الى الوزارة
الفلانية ؟! بمبلغ معين , من يوصلك يقول لك المبلغ قليل والمسافة كانت ابعد ؟!
ههههههههه هو سايق تكسي ويعرف المسافة لانه اكيد موصل قبلك عشرات ان لم نقل مئات
من الزبائن لنفس الوزارة او لنفس المكان ؟! حجة ليأخذ منك الف الفين دينار اكثر ؟!
تدخل على استعلامات الوزارة ؟! يرحبون بك احسن ترحيب لانك خوش صيده بالعربي صيد
ثمين ؟! ابو الاستعلامات يسألك وين رايح
فتقول: لشعبة العقود ؟! يسيل لعابه اكثر فيقول: مقاول ها ؟! ياخذ منك
الموبايل ويعطيك كارت رقم , ثم ينادي على أم جاسم تعالي اخذي الاخ الى المصعد ؟!
تاتي أم جاسم وتوصلك للمصعد وتفتح يدها (يعني رشوة) لو 3 الالاف دينار لو كارت
موبايل ب 3000 الالاف دينار (كارت الموبايل مفضل على اساس هدية مو رشوة فلوس) ,
تدفع وانت الممنون ؟! تستلمك أم غازي بالمصعد تسألك وين رايح ؟! وفورا تفتح ايدها 3000 دينار (رشوة) ركوب المصعد ؟! تدفع وانت
الممنون ؟! من توصل الى الطابق المحدد , تسلمك أم غازي الى أبوغازي لياخذك الى
غرفة العطاءات ؟! هم يفتح ايدة (رشوة) 3000 دينار او كارت موبايل ؟! تدخل الغرفة يرحبون
بك احسن ترحيب ؟! خوش صيده ؟! رزق واجانا من السما ؟! لا رزق ولا بطيخ ؟! رشوة
حرام ؟! منو اللي يفكر حلال حرام والسبح بيدهم ؟! وهذا حجي وهذا سيد (مزعوم) ؟! موظف اعطاء ظرف شروط العطاءات
للمقاولة صريح جدا ؟! رسوم ظرف شروط العطاءات هي 200 دولار فورا يطلب منك 300 الى
400 دولار تعتمد على لبسك وشكلك اذا مبين غني لو لا ؟! ويقول لك الموظف خلصت ظروف شروط
العطاءات والطابعة خربانه ولن تتصلح الى باچر (غدا) ؟! ويذكرك غدا يعني مبيت ليلة في بغداد ؟! اجور ليلة
في الفندق في بغداد هي 100 دولار مع الغدا
والعشاء والتاكسيات ورشاوي الدخولية مرة اخرى غدا يصير الحساب 150 دولار ؟! مو احسن تنطيني 300 دولار (يعني
اكثر 100 دولار) واطبع لك شروط عطاءات من القسم اللي بصفنا ؟! والا تعال باچر
(غدا) ؟! تدفع 300 دولار (أكثر 100 دولار) وانت الممنون ؟! وفورا يظهر بقدرة قادر
ظرف شروط عطاءات من تحت الارض ؟! تخرج من الغرفة ماكو أبو غازي ولازم تنزل بالدرج
, وماكو أم جاسم الى الاستعلامات من يرجع لك الموبايل يمد ايده 3000 دينار (رشوة)
ارجاع موبايلك سليم ؟! تركب تاكسي لتعود الى مطار بغداد الدولي , ونفس العملية ؟! تتفق
مع ابو التاكسي على مبلغ ومن يوصلك الى مطار بغداد الدولي يطلب الف او الفين دينار
اكثر بحجة ان المسافة بعيدة ؟! مرة اخرى الله يساعدك اذا اضطريت لدخول الحمام مكرم
السامع في مطار بغداد الدولي ؟! ترجع الى اربيل وفي مطار اربيل تذهب الى الحمام مكرم
السامع بدون حاجه (أكرر بدون حاجه) فقط لتثبت لنفسك ولتتأكد بأنك لست في بغداد وقد
وصلت الى العالم الحر والمتمدن والطبيعي والاعتيادي ... وتشكر الله ...
بغداد تريد تسيطر على
مطار اربيل الدولي حتى يحولوه الى نفس قذارة مطار بغداد ؟! ويجيبون (أم شاكر)
ثانية ويفرهدون فلوس عقد تنظيف حمامات المطار ؟! ويريدون دوائر الأقليم تصير تحت
سلطتهم حتى من تدخل الى ان تطلع تدفع رشوة الى الحجي او السيد المزعوم ؟!
هذا هو الفرق ما بين
بغداد واربيل في كل شيئ من حمامات مطار بغداد والى رئاسة الوزراء العراقية مرورا بالوزارات
والى البرلمان العراقي... هذه هي الحقيقة المره التي لا يتكلم عنها أحد عن بغداد
وحكومة بغداد ؟! ببساطة رشوة وقذارة ...
ولا حول ولا قوة الا
بالله العلي العظيم ...
اللهم اشهد اني بلغت
...
28-09-2017م
مع تحيات المهندس سرمد عقراوي
كتاباتي ليست لا تفاخرا ولا مدحا بنفسي لا سامح
الله ولكنني عشت في الغرب معظم حياتي وتعلمت منهم بان اكتب عن تجاربي كما يكتبون
عسى ولعلها ان تنفع الاخرين ؟! وكما انا انتفع واستفيد من قراءة تجارب الاخرين ؟!
ومن باب زَرَعْوا فَأَكَلْنا ؟! نَزْرَعُ فَيَاكُلونْ ؟!.
ليست هناك تعليقات:
إرسال تعليق