بحث مختصر حول إختلاف الآراء ما بين البَشَر ؟!
قابيل قتل
اخوه هابيل لانهم اختلفوا في موضوع منو يتزوج منو ؟! يعني الدنيا منذ البداية كانت
مشاكل بالعراقي نسميها طلايب ؟! زين شنو الحل ؟! ننتحر مثلا ؟! رأي يطبقه مجموعة
من الناس كل يوم ؟!
راح تگولون شنو هذا التشاؤوم ؟! صبر ...
اني داسرد تأريخ الاختلافات ما بين البشر والحلول حسب
رأي مع اختلافها ؟!
ناس تگول نريد أمر الله ؟! أمر الله هم اكو 3 اديان
يسمونها الاهية (من آله) وناس يگولون لا ؟!
اختلاف وجهات نظر ؟! إختلاف آراء , وحتى هاي
الاديان بيناتها في نفس الدين مختلفين ؟!
شفتو شلون الاختلاف ديطلعلنا من زرف الحايط ؟! مثل
شعبي عراقي ...
زين والحل ؟! اول مرة كانت مجموعة هذا الدين تهجم
على مجموعه ذلك الدين وتقتلهم او تغصبهم يدخلون في دينهم ؟! هم صارت مشكلة جماعة
الدين الواحد صاروا يختلفون بيناتهم ؟! زين شنو الحل ؟! نفصلهم كلمن في مدينة ؟!
هم كم سنة ومدينة تهجم على مدينة ودك گتل واحد بالآخر ؟! زين شنو الحل ؟!
گالوا احسن حل من يصير خلاف بدل ما نگتل واحدنا
الآخر نصوت والاغلبية يمشي رأيها ؟!
خوش فكرة بالمقارنه بالقتل ومنه الحروب ؟! تدرون هاي
شنو يسموها ؟! الديمقراطية ...
بعض الناس گالت اني ما اريد ديمقراطية ؟! اريد حكم
ديني ؟!
وهم رجعنا الى المربع الأول ؟! هناك على الأقل 3
أديان ؟! يا دين يحكم ؟!
خلي ننزل شويه الى العائلة والتي هي نوات المجتمع
أب وأم واولاد وبنات ؟! صبر بعد ما دخلنا في معمعة زواج الابناء والبنات والمشاكل
وجماله الاحفاد وهلم جره ... بالعائلة الواحدة همين هنالك خلافات ؟! يعني الاب
كلما يختلف مع الأم يضربها سچين ؟! الناس تگول لي ليش انت تكتب جلفي (لغة عاميه) ؟!
عمي 46% من سكان العراق تحت سن 15 سنة واللي شويه اكبر كانوا تحت الحصار ؟! زين
اذا يعرفون يقرون ويكتبون ؟! المهم نرجع
رضا الناس غاية لا تدرك ؟! أبدا ... ومهما حاولنا
سيكون هنالك اختلاف في وجهات النظر داخل العائلة الواحدة فما بال المجتمع ؟! زين
والحل ؟! لازم نعترف بهذه الحقيقة اولا ؟! الدنيا دار ابتلاء ومشاكل ؟! طفر واحد وگال
لي انت اشكد سلبي ؟! بويه , عمي اني مو سلبي اني اريد اشوف الواقع شنو ؟! حتى اعرف
اشلون اتعامل وياه فينقلب الموضوع الى ايجابي ؟! رأي گلمن يسوي اللي يريده على شرط
ما يتعدى على الاخرين ؟! وهاي هم بيها مشكلة ؟! شنو هو تعريف التعدي على الآخرين
؟! كلمن له رأي ؟! صارت حكومة انتخب الشعب النواب حطوا قوانيين ؟! وهم صارت مشكلة
؟! رأي لا تقتل لاتغتصب لاتسرق اضعف الايمان ؟! وهمين ناس تريد تضيف وناس تريد
تطرح ؟! والدي (الله يرحمه) كان عنده مقوله:
لا الشرك بالله ولا الإضرار بالناس ؟!
وهمين گمزلي واحد وگال اني علماني ما اؤمن بالله ؟!
ميخالف , لا اكراه في الدين ؟!
شنو رأيكم نتفق على:
(لا الإضرار بالناس) ومنه ومما تقدم فـ (الاختلاف
لا يفسد في الود قضية) ؟! اتفقنا ...
هسه هاي نظرة ايجابية لو لا ؟! مو هم يصير اختلاف
وترجعونا للمربع الأول ؟! هههههههه
ولله في خَلقِه شؤون ...
06-06-2006م
مع تحيات المهندس سرمد عقراوي
ليست هناك تعليقات:
إرسال تعليق