المكان: احد البيوت في مدينة الصدر.
الزمان: بعد سقوط النظام الصدامي بفتره زمنيه بسيطه.
دق جرس الباب وذهب صاحب الدار لفتح الباب؟!.
فتح الباب سلام عليكم ها عرفتني؟! يمعود ابوجاسم شلون انساك؟! متغيرت ابدا ؟! وكضينا احلى ايام في الاعداديه (مع المصافحة والحضن والبوس):
ابو كرار: وين جنت؟! صارلي زمان ما شفتك؟!.
ابو جاسم: غير بالخارج من وراكم؟!.
ابو كرار: من ورانا شنو؟! احنا شعلينا ؟! كلنالك صير ويانه ؟! مقبلت ؟!.
ابو جاسم: شصير وياكم؟! اكو واحد يقتل ويذبح اهله وناسه؟! مجنون اني؟!.
ابو كرار: لا تتفلسف براسي؟! لا كتل ناس ولا بطيخ؟! هي الدنيا هيجي؟!.
ابو جاسم: شكلنا ...؟! وجم مرة نصحتك بان صاحبكم (ابن العوجة) راج يجي يومه ويسقط لا تحط ايدك بايده؟! اخوك مخابرات وانت فدائي وابن عمك امن ؟! ليش....... ليش........؟! ما تسمعون كلام؟! هسه راح تأكلون هوا ؟!.
ابو كرار: لا هوا ؟! ولا بطيخ ؟! يمعود احنا مثل الحربه نتقلب مع الزمان والمكان؟! تعال... يلى طب وتفرج؟!.
دخل ابو جاسم الى البيت وهو مقلوب رأسا على عقب وبرميل النفط مليان اوراق وهدوم تحترق وكل ساعه يجي واحد من البيت يضيف اوراق لو ملابس لتحرقها النار؟! داخل البيت مجموعة منهمكه في عملها ؟! واحد ديشيد عمايم والاخر ديحرك(من حرق) جبهة وجهه مع وجود حبوب مسكنه الاخر ديجمع كتب ياخذها للبرميل ليحرقها ؟! الاخر ديسفط كتب دينيه اغلبها من عناوينها ممنوعه ؟! الاخر ديقرأ كتب ؟!.
ابو جاسم: هاي شدتسوون؟!.
ابو كرار: مو كتلك لا هوا ولا بطيخ ؟! دنتحضر حتى نستلم ونتلون بلوننا الجديد؟! عمايم ومحابس وجبهه محروكه وكتب ؟! دنتفقه.......بالدين؟! هههههههههههههه مع ضحكة طويله.
ابو جاسم: (من هول الصدمه) يعني شنو قصدك؟!.
ابو كرار: وداعتك ؟! جانت بيدنا بوكت صدام ؟! وهسه هم راح تصير بيدنا ؟! بس نغير لبسنا ؟! انت غشيم وعلى نياتك ؟! وما تدري شكو ماكو ؟! ومتدري منو احنا ؟!.
ابو جاسم: يابه منو انتوا ؟!.
ابو كرار: حبيبي ....... هسه........ افهمك.... منو احنا ؟! :
احنا شقاوة الشيعة اللي نصرنا معاويه ضد أمير المؤمنيين
واحنا شقاوة الشيعة اللي وكفنا مع يزيد وذبحنا الحسين
واحنا شقاوة الشيعة اللي كنا برضانا جندرمه للعثمانيين
واحنا شقاوة الشيعة اللي وي الملك جنا اول المهوسين
واحنا شقاوة الشيعة اللي خلينا الشيوعيين يستغلونا واحنا المستغلين
واحنا شقاوة الشيعة اللي كنا مع الحرس القومي سنة ثلاث وستين
واحنا شقاوة الشيعة اللي ردينا البارحة مع البعث فدائيين
واحنا شقاوة الشيعة اليوم من مدينة الصدر بعمايم ولبس مهديين
16 -10 - 2011م
SARMAD_AQRAWI@YAHOO.COM
ليست هناك تعليقات:
إرسال تعليق