حديث النفس ؟! من القلب الى القلب ؟!

خواطر: حديث النفس ؟! من القلب الى القلب ؟!

ورد في الحديث: من عرف نفسه فقد عرف الله......
فتحت عيني على الدنيا بعمر 11 سنه.... انا ولد ومن عائله تتكون من أب وأم في زواج....واخوين....
ونحن نعيش في مجتمع يتكون من عدة عوائل بل ملايين... ونسكن في محله وعدة محلات تكون مدينه
وعدة مدن تكون بلد وعدة بلدان تكون العالم....
انا عراقي وهنالك دول اخرى في العالم ومنه دول عربيه واجنبيه....
هنالك اديان في العالم الا اننا نحن مسلمون... وهنالك سنه وشيعه......
والتساؤلات: من نحن البشر.... من خلقنا.... ولماذا خلقنا..... وما هو مصيرنا.....
اكو الله ؟! لو ماكو الله...... هل الله واحد ؟! ام هنالك عدة آلهه ؟!
اذا اكو كم الله (استغفر الله) كان كل الله بعث انبياء غير.... يعني اكو بس الله واحد....
شلون اتعامل وي البشر ؟! شلون اتعامل مع امي وابي ؟!
شلون اتعامل مع اخوتي ؟! شلون اتعامل مع اولاد الجيران او بنات الجيران او الاصدقاء ؟!
شلون اتعامل مع المجتمع في المدرسه في السوق في الشارع ؟!
لازم اروح للمدرسه حتى اتعلم..... وبعدين ... اروح للجامعه... واتخرج.....
اشتغل يصير عندي مصدر رزق ..... اتزوج.....
واكرر تجربه ابي وامي وابدأ عائله جديده....
والعائله الجديده تبدأ مجتمع جديد... ودوله جديده.....
واولادي يكررون نفس الشيئ..........
وهاي هي سنة الحياة........
***************************
ماكو الله.... لعد ليش عايشين.... وناس مثل العراقيين متعذبيين..... ليش ما ننتحر مو احسن ؟!
واذا ماكو لا جنه ولا نار ... ولا حساب ولا كتاب....ليش ما اقتل 10 اشخاص وابيع اعضائهم
واصير مليونير.... كل كليه بـ 50 الف دولار..... وعدكم الحساب.......
***************************
اكو الله زين لعد اكو سبب للحياة الله يريد يجربنا لأنه عادل وحتى يجازينا على قدر اعمالنا بالدنيا
واكو حساب وكتاب...... والله ما يضيع عمل الخير.... والدنيا ابتلاء وامتحان وتجربه.....
حتى الله سبحانه وتعالى من يعطينا قسمتنا بالآخره من كل الجوائز والمكافآت يكون بسبب عدله ورحمته
وكرمه وحكمته......حتى لا واحد يكول: ليش يا ربي انطيت فلان وما انطيتني ؟!
لان فلان افتهم الدنيا ومعنى الحياة واستغل الدنيا في تقوى الله وفعل الخير والعمل الصالح .... فالله اعطاه الجائزة....
بالجنه ودار الرضوان والحياة الابديه السرمديه....
اما انت فاخذت الدنيا لعب ولهو وهزو وشقى وضحك ... وآخر اغنيه وآخر شهادة وآخر موديل.....
ونسيت تخاف من الله ونسيت تقوى الله وفعل الخير والعمل الصالح.....
نسيت الله فنساك.... وسيعذبك هم بالدنيا وهم بالآخره......
في الدنيا بالشقاء والمرض والهم والغم..... ومن بعدها في الاخره بنار جهنم...
اي بس فلان كان مؤمن بيك ياالله وعنده شهادة وعنده فلوس وهم كان يضحك ويتشاقى....
ويسوي كل اللي اسويه ماعدا الحرام وهم ابتليته ؟!
بالشقاء والمرض والهم والغم ؟!
اي بس هو ما يأس في الدنيا من رحمتي.... بس انت يأست... وتركتني ونسيتني فاني هم نسيتك....
ومصيرك النار خالدا فيها الى الأبد.... وهو مصيره الجنه..... الى الأبد..... جفت الحروف وسقط القلم...
*****************************
زين اشلون اتعلم دروس من الدنيا..... بالتجربه ....
فلان غشني... اني هم اغشه..... واتعلم الغش منه..... لا....لانه اذا تعلمت الغش يصير كلبي (قلبي) اسود
فلان ناكر الجميل.... هم اني هم اصير ناكر للجميل.... لا...... لانه هم كلبي (قلبي) يصير اسود.......
فلان غدر بي.... يعني اني هم لازم اغدر بيه..... لا.... لانه هم كلبي (قلبي) يصير اسود.......
وكل هاي الصفات السيئه تحط نقاط سوده في قلبي....
ومن يصير كلبي (قلبي) كله اسود........تره ما يدخل نور الله في قلبي........
فاذا ما تساوى عقلي الظاهر مع عقلي الباطن من فطرة الله.......
ماراح اقدر افتح قلبي.... واللي بكلبي (بقلبي) ما يصير على لساني....
فاصبح منافق.......
زين غلطت وسويت فد شيئ حرام..... شسوي.....
استغفر ربي ... واسوي فد شيئ خير والله غفور رحيم.........
بس من شروط التوبه انه ما اكرر فعل الحرام..... استغفر الله... خومو اقشمر رب العالمين.....
اذا استمريت على هالحاله..... اكيد نور الله راح يدخل كلبي (قلبي)......
ويصبح نور الله في قلبي وفي وجهي وعلى لساني وفي سمعي وبصري ....
ومن فوقي ومن تحتي ...ومن امامي ومن ورائي ......
وعلى يميني وعلى شمالي وعلي من جميع جوانبي.....
فتحيط بي الهالة الزرقاء........
*****************************
زين اشلون اعرف هذا خير وهذا شر ؟! لازم ادرس الدين وافتهم الله شيريد مني اسوي.....
بس الناس متونسه واني محبوس..... لا اكو ملايين الهوايات الحلال......واحلى من الحرام......
*****************************
خلاصه الدنيا شنو..... لا اشرك بربي الله.... واصلي.... وما اسوي حرام.... واسوي الخير واذبه بالشط
الدنيا صعبه ودار امتحان...... زين ليش اعقدها على غيري من الناس.....
بالعكس لازم اساعد الناس على الدنيا واسهللهم الأمور....سواء اكنت مدير.... لو وزير...لو عامل...
لو ابن.... لو اب.... لو عم.... لو خال.... لو زوج.... لو حبيب ......لو صديق..........
بقدر استطاعتي..... بس بدون ان اخليهم يؤذوني......... وبشروطي... وتخطيطي......
يعني اني اكون مع الناس على الدنيا.... وليس كما يريدني الشيطان مع الدنيا على الناس...
ارحموا من في الأرض يرحمكم من في السماء........
واتونس بالدنيا بكل شيئ مادام حلال.....وما يغضب رب العالمين......
زين منين اتعلم الحكمه.... من الرسول والائمة..... شيكولون بهذا الموضوع......
اعمل لدنياك كانك تعيش ابدا.... واعمل لأخرتك كانك تموت غدا.......
ان الحسنات يذهبن السيئات....
من يعمل مثقال ذرة من خير يره..... ومن يعمل مثقال ذرة من شر يره.....
دير بالك من اصدقاء السوء لان اصدقاء السوء في لغة الكومبيوتر اليوم قص والزق....
**********************************
زين هاي شنو مرت 41 سنة وانا على هذا الحال..........
الحمد لله والشكر ان شاء الله ما شاء الله لا قوة الا بالله كلبي (قلبي) بعده ابيض.....
لانني كنت مشغول بمعانات شعبي من ديكتاتور والنضال ضده......
وبخوف الله وفعل الخير والهوايات وكل ما في الدنيا من الحلال......
واصلا ما كان عندي وكت افكر بالحرام.....
والأهم حميت نفسي من اصدقاء السوء.....ما كان عندي بس 3 اصدقاء بهذه الدنيا
واحدهم استشهد والأثنين بعدهم معايه...... واحدهم تغير.... وصار اسوء... تركته....
والثاني... الحمد لله بعده بالطريق الصحيح.......
فما دخلت بمتاهات لا الغيبه ولا النميمه وغيرها من اللي يصير مابين الاصدقاء ........
احمد لله واشكره بان نيتي صافيه...... فالله اعطاني توأم روحي......
الأولى...... والثانيه ان شاء الله بالطريق.......ما اريد بعد شيئ من رب العالمين بعدها.....
والحمد لله الدنيا كانت زينه لحد الآن ..... وان كان الامتحان صعب في بعض الاحيان
بس تبقى العبره بالنتيجه والفوز بالجنه وهي الحياة الأبديه السرمديه....
رجعت الى بلدي بعد غربة طويله.....والحمد لله داكتب مذكراتي..... بصدق وقلب نظيف.....
وانتبهت ما شاء الله بانني قد جربت وما ظل شيئ حلال ما سويته بحياتي.....
بل الاشياء اللي سويتها قلما يقدر... بل يوفق الله القليل من الناس انه تسويها......
ليس مدحا بنفسي.... ولكن يمكن تكون عبره ودرس لغيري من الناس......
وتسليه لتوأم روحي..........
واليوم احمد ربي واشكره على كل نعمه التي انعمها علي بالماضي...
وان شاء الله الجاي من النعم احسن بالمستقبل..........اكيد ان شاء الله...
وكما جاء في الدعاء:
هيهات (يا رب العالمين) ان تضيع من ربيته وعلمته واكرمته.....
والله كريم.......
06-04-2013م
مع تحيات المهـندس ســرمـد عـقـراوي
sarmad_aqrawi@yahoo.com